Ein anpinden mit dem halben spieszz gogen ainen gesichtstosz
Item schickh dich allso mit Disem zufechten Inn den anpvnde mit dem halben spieszz. stee Mit deinem lincken fuosz vor dein spieszz Inn der mite mit baiden henden das dein lincke hand vornen gewendt sey die recht bey deinem lincken schenkel Indes scheusz Im deinen spieszz durch deine hend zu seiner prust. stost er dir also zu vnnd du In dem gesichtstosz gögen Im steest mit deinem lincken fuosz vor. so volg mit deinem rechten schenkel hinnach vnnd wind mit deinem spieszz auf dein lincke seiten vnnd stosz Im damit zu seinem gesicht versetzt Er dir das, so zeuch deinen rechten schenckel wider zuruckh raist er dir dann nach mit ainen stosz so wend dich In den geschrenckten wechsel auf dein rechten seiten vnd nimb Im den stosz hinweckh. Indes trit mit deinem rechten schenckel wider hinnein vnnd stosz Im nach seinem gesicht oder der prust. stost Er dir also zwifach nach deinem gesicht. so setz Im das ab vornen an deinem spieszz Indes wechsel Im durch von deiner rechten seiten auf sein lincke vnnd stosz Im nach seiner lincke Achsel. versetzt er dir das so volg mit deinem lincken schenckel hinnach vnnd stich vnd stich Im nach seinen gemechten stost er dir also vnden zu deinen gemechten vnnd du mit deinem rechten fuosz vorstest so setz den zuruckh vnnd wend Im den stosz ab auf dein lincke seiten. Indes trit behend wider umb hinnein vnnd stost Im nach seinem furgesetzten schenckel Will er dir den stosz absetzen so gee behend wider auf Im zu dem gesicht vnnd zeuch dich damit zuruckh Inn guter versatzung.
