Page:MS Dresd.C.93 196v.png

Ain Gesichtstosz gögen ainem gemechtstosz

Item wann du mit dem zufechten Zu dem Man kumpst so trit mit deinem lincken schenckel hinein vnd stosz Im von deiner lincken seiten auf sein rechte zu seinem gesicht stost er dir also nach deinem gesicht vnnd du mit deinem lincken fuosz vorsteet gögen Im. so setz Im seinen stosz ab mit deinem vordern orth Indes stosz Im nach seinen gemechten stost er dir allso nach deinen gemechten. so setz deinen lincken schenckel zuruckh vnnd setz Im den stosz ab vornen an deinem spieszz. Indes trit mit deinem lincken schenkel wider hinnein. vnnd stich Im nach seinem leib versetzt Er dir das so wind Im gestrackt an seinem spieszz auf zu seinem gesicht stost Er dir dann allso zwifach zu so versetz Im das mitten In deinem spieszz. Indes volg mit deinem rechten schenckel hinnach vnnd stosz Im auch nach seinem gesicht. wirdt er des stosz gewar vnnd setzt dir den ab So wechsel durch volg mit deinem lincken fuosz hinnach vnnd stosz Im nach seiner rechten seiten Stost er dir also nach deiner rechten seiten. vnnd du mit deinem lincken fuosz vorsteest. so setz Im den stosz ab vornen an deinem spiesz auf dem rechte seiten vnnd In dem absetzen trit mit deinem rechten sch [schenckel] hinnein vnnd stosz Im nach seiner prust auf sein rechte seiten versetzt Er dir den stosz. so trit mit deinem rechten fuosz wider zuruckh vnnd gib dich mit deinem spieszz Inn die sterck Indes arbait mit Im von einer plosz zu der anndern. vnden vnd oben wa er dir werden mag. sticht er dir deine plossen also. so gee mit deinem spieszz wol auf vber dein haupt. vnnd setz Im das ab Indes stosz Im nach seinem gesicht vnd zeuch dich damit zuruckh In gute Versatzung.