Page:MS Dresd.C.93 197r.png

Der ainfach wechsel gögen ainner hut Inn dem halben spieszz

Item schickh dich allso mit disem Zufechten Inden ainfachen wechsel. Stee mit deinem Lincken fuosz vor dein spiesz auf der Erden mit deinem Ort. dein lincke hand bey deinem lincken knie Inn deinem spiesz dein rechte bey deiner Rechte seiten hinden bey deinem Ort. Indes volg mit deinem rechten schenkel hinnach, vnnd stosz Im nach seiner lincken seiten stost er dir also nach deiner lincken seiten vnnd du In der hut steest mit deinem halben spiesz deinen lincken fuosz furgesetzt. deinen spiesz mit baiden henden vornen an deiner prust auf deiner rechten seiten so trit mit deinem rechten schenckel hinnach vnnd setz Im das ab mit deinem halben spiesz. Indes spring zu Im hinnein vnd lasz Im deinen halben spiesz zu seinem gesicht schiessen so mag er zu kainer arbait kumen Raist er dir also nach vnnd du mit deinem vordern Ort nit arbaiten kanst so lasz den spiesz zuruckh schiessen durch dein lincke hand, so magstu mit Im widerumb zu gleicher arbait kumen Inn dem spring auch widerumb zu Im hinein vnnd arbait mit deinem halben spiesz zu seiner rechten plosz. wa er die werden mag setzt er dir das ab so volg mit deinem lincken fuosz hinnach vnnd stosz Im nach seinem leib. sucht er dir deine plössen also mit seinem halben spiesz so zeuch dich zwiffach zuruckh Inn den geschrenckten wechsel vnnd nimb deinen spiesz widerumb In dein rechte hand hinden bey deinem Ort auf das lengst Indes arbait mit Im schwech vnnd sterckh von ainer plösz zu der anndern. wa Er dir werden mag versetzt er dir das so stosz Im mit deiner rechten hand nach seinem gesicht ainen lanngen stosz mit deinem spiesz vnnd zeuch dich damit zuruckh In Guotte versatzunng