Page:MS Dresd.C.93 197v.png

Ain verkerter stosz gögen ainem abnemen

Item schickh dich allso mit disem Zufechten Inn den verkerten stosz stee mit deinem lincken fuos vor. Dein lincke hand vornen bey deinem lincken Knie Inn deinem spiesz dein rech_er zwische deinen baiden schenklen hinden bey deinem Ort deinen vordern ort gögen seiner prust gewendt. Indes trit mit deinem rechten schenckhel hinein. vnnd thu sam wollestu Im zu seiner rechten seiten stossen Indes verker deine hend vnnd stosz Im zu seiner lincken seiten mit ainem verkerten stosz. stost Er dann also gögen dir vnnd du In dem abnemen steest. deinen lincken fuosz furgesetzt. deinen spiesz vornen auf der erben Inn der hoch vor deinem gesicht mit gestrackten Armen. so nimb Im das ab vnden vnnd oben von ainer seiten zu der annderen Inn dem volg mit dem rechten schenckel hinnach vnnd wind dich auf mit deinem spiesz In dein rechte seiten vnnd stosz Im nach seinem hals, versetzt er dir das so wechsel durch von deiner rechten auf sein lincke seiten. vnnd stosz Im damit zu seinem gesicht. Wirt er des stosz gewar vnnd setzt dir den ab so volg mit deinem linckenhinnach. vnnd stosz Im nach seiner lincken seiten. stost Er dir also zu vnnd du mit deinem rechten fuosz vorsteest. so wind dein rechte hannd auf dein lincken seiten. so setztu Im den stosz damit ab Indes zeuch deinen rechten schenckel zuruckh vnd wend dich mit deinem spiesz widerumb auf dein rechte seiten In die sterckh. Indes volg mit deinem rechten schenckel wider hinnach vnnd stosz Im seiner obern plosz zu. vnd zeuch dich damit zuruckh In gute versatzung.