Page:MS Dresd.C.93 198r.png

Ein obers einlauffen gögen ainnen Obern absetzen

Item wann du mit dem Zufechten zu dem Mann kumpst so schickh dich allso mit deinem spiesz setz deinen Lincken fuosz fur vnnd Nimb deinen spiesz Inn der mitte lasz deinen lanngen Ort zuruckh hanngen deine arm wol gestrackt Inn deinem spiesz. die linck hand davorn die recht hinder deinem haupt. Indes stosz Im mit deinem vordern ort zwischen seinen baiden armen hinnein zu seiner prust. Ist er dir also eingelauffen vnnd du mit deinem lincken fuosz vorsteest vnnd stoszt dir zu deiner prust. so zuckh deinen lincken schenckel wider zuruckh vnnd setz Im den stosz ab zwischen deinen baiden armen mit deinem spiesz Indes spring behend mit deinem rechten fuosz auch zuruckh vnnd lasz deinen spiesz behend. durch deine hend schiessen das du den vordern ort. In deiner lincken hand habest. Indes stosz Im mit deinem vordern Ort zu seinem gesicht oder der prust. versetzt er dir das vnnd raist dir nach so wechsel dich behend zwifach zuruckh das du deinen spiesz widerumb bey deinem hindern ort habest In deiner rechten hand auf deiner rechten seiten wechselt er sich also von dir zuruckh so scheuss Im mit der lennge deines spiesz zu seinenn gemechten Inn dem volg mit deinem rechten schenkel hinnach vnnd stosz Im zu seiner prust setzt er dir das ab vnnd du dein spiesz wider In die lennge gefast hast. So wechsel Im durch. von seiner lincken auf sein rechten seiten zu seinem gesicht. wirt er des stosz gewar vnnd versetzt dir den. so trit mit deinem lincken schenkel hinnach vnnd stosz Im nach seiner lincken seiten vnnd zeuch dich damit zwifach zuruckh Inn guter versatzung /.