Ein anpvnd darausz ain einlauffen geet mit ainnem Wurff
Item schickh dich also Inn den anpvnd Stee mit deinem lincken fuosz vor vnnd bind Im mit der schwech an den spiesz Von seiner rechten. seiten Indes wechsel Im behend durch. vnnd stosz Im seiner lincken seiten zu stost er dir dann also nach deiner lincken seiten vnnd du desselben gewar wirst so nimb das mit deinem halben spiesz ab volg mit deinem rechten schennckel hinnach vnnd far mit baiden henden mit deinem spiesz wol auf vber dein haupt so hastu ainen vollen stosz auf In vnnd stosz Im damit nach seinem gesicht oder der prust stost Er also ausz der sterckh auf dich so lasz deinen spiesz fallen vnnd wind Im seinen spiesz von vnnden auf von deiner prust mit deiner lincken hand Indes trit behend hinnein vnnd erwisch Im seinen spiesz Inn der mit. hat er der deinen spiesz also starckh erwist. so lasz dein lincke hand von deinem spiesz vnnd greiff damit nach seiner schwech seines rechten Arms hinder dem Elnpogen trit mit deinem rechten schenckel hinder seiner baid schenckel Inn dem greiff mit deiner rechten hand auf sein lincken Arm Inn die schwech hinder dem Elnpogen vnnd schrenckh deine arm mit ganntzer sterckh das du mit dem kopff zwischen deinen baiden armen hindurch komest vnnd wend dich damit. so tregstu In auf dem rucken wa du In hinhaben willt vnnd er mag dir kainen schaden thun.
