Ain obers einhawen mit ainem vndern Reyssen
Item schickh dich Allso Inn das ober einhawen. stee mit deinem lincken fuosz vor vnnd hallt dein hellenparten Inn dem oberhaw. stat er dann auch gögen dir seinen lincken fuosz furgesetzt. sein hellenparten dir gögen deinem gesicht. so nimb Im das mit oberhaw Indes reiss zu dir von deiner lincken auf dein rechten seiten vnnd In dem reissen gang auf mit deiner hellenparten Im zu seinem gesicht. Begert er dir also zu deinem gesicht zugeen so wend dein hallenparten mit dem plat hinder seinen schenckel vnnd zeuch damit an dich. so ist sein stosz vmb sunst. vnd magst In auch damit fellen. Indem raisz Im nach mit ainem stosz zu seinem gesicht. stost er dir also zu deinem gesicht. so nimb Im das mit deiner halben hellenparten ab vnnd wechsel Im durch von ainer seiten zu der anndern vnnd such Im damit die nechsten plossen. setzt er dir das. so pind gleich mit Im an sein hellenparten. vnnd Inn dem anpund wind mit deinem hindern Ort seinen vordern hinweckh. vnnd trit mit deinem rechten fuosz Innwendig fur seinen lincken Indes far Im mit deinem hindern orth vmb seinen hals auf sein rechten seiten zeuch In damit zu dir so magstu In werffen. begert er dich also zuwerffen. so verwechsel baid hend an deiner hellenparten. vnnd setz Im dein hellenparten an seinen rechten arm. scheub In damit von dir. so bistu sein on schaden ledig.
