Ainn vnnderer schlag gogen ainem abnemen
Item hallt dich also mit disem stückh Wan Ir zusamen gond stannd mit deinem rechten fuosz vor vnnd halt dein stanngen Inn baiden henden gögen dem man bey deinem hindern Ort. Indes schlag Im nach seinem rechten furgesetzen schennckel. schlecht er dir also vnnden zu. nach deinem rechten fuosz. vnnd du mit dem selbigen vorsteest. vnnd helst dein stanngen mit deinner linckhen hannd bey deinem hindern Ort hinder deinem haupt. dein rechte Inn der mitt vor deinem gesicht. so nimb Im seinen schlag ab mit deiner stanngen auff dein rechte seiten Indes trit mit deinem linckhen schennckel auff sein rechte seiten vnnd schlag Im mit deinner stanngen mit starckh zu seinem haupt Schlecht Er dir also oben zu. so trit mit deinem rechten schennckel zuruckh vnnd gee mit deiner stanngen wiederumb auf. nimb Im seinen schlag damit ab auff dein rechte seiten. Indes trit behend mit obgemelltem fuosz wider hinnein vnnd schlag Im gesctackts oben nach seinem haupt. trit damit von Im zuruckh.
