Item stichst[u] mit Einnem gleich ein aůß der vnndern hůt vonn deinner rechten seitten vnnd biß starckh am schwert vnnd ist er aůch starckh so far mit dem knopff vbersich aůf mit der rechten hannd vnnd mit der linncken hannd lait Im den ort vber seiinen linncken Arm an die průst oder vnnder sein linncke Vchsen vnnd setz Im an vnnd winnd alweg mit dem ansatz vnnder die Vchsen In die hut
Item das sein die vnnderhaben vnnd die aůfsteen im Kampff
Item wann Er fellt So fall mit Im allweg zů der rechten seitten vnnd mit dem rechten knie fall Im alweg zwischen seinne bain vnnd der linncken hannd far vmb sein hals vnnd giß nit zů gech das dů mit zů seer ÿber In fallest vnnd greiff seinnem dolchen zeůch deinnen dolchen nit dů habest dann In gewiß will er dir dann Inn dein dolchen fallen so stich Im zů der hannd vnnd růckh nit wider
