Die schwech vnd sterck aus dem anbund
Item wann du mit dem zufechten zu dem aynen kombst, so trit mit deinem rechten fuß gegen Jn hinein, halt deinen Spies gegen seinem gesicht, mit deiner linggen hand ob deinem linggen schenkel, Jn des trit mit deinem linggen fuß hinein, vnd stoß Jm nach seinem hals, stoßt er dir also zu, vnd du mit deinem rechten fuß vorsteest, dein rechte hand ob deinem rechten Knie, dein lingge hinden ob deinem linggen schenkel in deinem Spies, So setz Jm den soß ab vornen, in deinem Spies auf dein rechten seitten, Jn des trit mit deinem linggen schenkel hinein, vnd stoß Jm nach seinem gesicht, versetzt er dir das, so wechsel Jm wenden durch vnd stoß Jm nach seiner prust, Jn des volg mit deinem rechten fuß hinnach vnd gee mit deinem Spies auff in den freystand, vnd stoß Jm nach seinem gesicht, stoßt er dir also aus dem freystand zu, so ziech deinem linggen schenkel zurügk, vnd setz Jm das ab mit geschwendtem wechsel auff dein linggen seitten, Jn des trit mit deinem rechten fuß auch zurügk, vnd wind dich auff aus dem wechsel auf dein rechte seitten mit deinem Spies, Jn dem tritt mit deinem rechten fuß wider hinein, vnd stoß Jm mit der stergk zu seinem gesicht, Versetzt er dir das, so ziehe deinen Spies wider zu dir, vnd stoß Jm behend widerumb zu wie vorgeschrieben stat seins gesichts, Jn des laß deinen Spies vornen nider, mit deinem rechten arm wool auff über dein haubt, deinen spies vor deinem angesicht in guter versatzung, Stoßt er dir also zwifach zu deinem Gesicht, so nimb Jm den stoß hinwegk zwischen baiden handen in deinem Spies, Jn des volg mit deinem linggen schenkel hinach vnd stoß Jm nach seiner prust, wend dich damit zurügk,
