Page:Cod.10825 167r.png

Ein rechte vnnd ein lingke offne hut

Jtem schick dich also mit disem zufechten in die rechte offen hut, Stand mit deinem rechten fuß vor mit deinem Spies vornen auf der erden, dein lingge hand bey deinem hindern ort, dein rechte bey deinem rechten Knie, Jn des trit mit deinem linggen schenkel hinein, gee vornen mit deinem Spies übersich, vnd stoß Jm zu seinem gesicht, Stoßt er dir dann also deim gesicht zu, vnnd du mit deinem linggen fuß vorsteest, dein lingge hand vornen bey deinem linggen Knie in deinem Spies, dain rechte hinden bey deinem ort, so setz Jm seinen stoß ab aus der offenen hut Jnn die Schrankhut, vnd setz deinen linggen fuß zurügk, Jn des wind dich widerumb auf in den freystand mit gleichen füssen zusammen, das dein Spies auff deinem linggen elenbogen lig, Jn dem volg mit deinem linggen schenkel hinnach, vnd stoß Jm nach seinem gesicht, Versetzt er dir das, so volg mit deinem rechten fuß hinnach, vnd stoß Jm nach seine linggen prust, Stoßt er dir also zu, so nimb Jm seinen stoß ab mit deinem langen ort von deiner linggen auff dein rechte seitten, Jn des volg mit deinem rechten schenkel hinnach, vnd stoß Jm nach seinem gemechten, Versetzt er dir das, so volg mit deinem linggen fuß hinnach, gee mit deinem Spies wol auf über dein haubt, vnd stich Jm nach seinem gesicht, Stoßt er dir also zwifach zu, so setz Jm das ab mit deinem vorderen ort deines Spies, Jn des wechsel Jm durch von seiner linggen seitten auff sein rechte zu seinem gesicht oder der prust, vnd volg mit deinem rechten schenkel hinnach, so hast du ainen langen stoß, Jn dem wend dich in die offen hut auff dein rechte seitten, das dein rechter fuß mit dem winden zurügk gee, vnd wend dich damit wider= umb zurügk in gute versatzung,