Page:Cod.10825 170v.png

Ein unders einlauffen gegen ainen vndern absetzenn

Jtem schick dich also mit disem zufechten, wann du dich zu dem ainen fichst, so bind Jm vornen an seinen Spies, das dein lingger fuß vorsteet, vnd in dem anbinden empfind ob er waich oder fest sey an seim Spies, Jst er waich gegen dir, vnd helt dir mit panik wider, so laß deinen Spies behend durch deine hand zurügk lauffen, Jn des trit mit deinem rechten schenkel hinein, vnd stoß Jm nach seinem hals, Jst er dir also eingelauffen, vnd stoßt dir nach deinem hals, vnd du mit deinem linggen fuß vorsteest, dein lingge hand bey deinem linggen Knie, den hindern ort bey deinem rechten schenkel, So gee mit deinem rechten fuß hinein, vnd setz Jm seinen ort ab zwischen deinen baiden henden in deinem Spies auff dein rechte seitten, Jn dem setz deinen rechten schenkel wider zurügk, vnd wind dich an deinem Spies auff dein rechte seitten, vnd in dem winden laß deinen Spies zurügk lauffen durch deine hand, so kanst du mit deinem vorderen ort mit Jm zugleicher arbait kommen, Jn des vecht Jm durch an seinem Spies von seiner linggen seitten auff sein rechte vnd stoß Jm damit nach seinem gesicht, Wechslet er dir also durch vnd stoßt dir nach deinem gesicht, So setz Jm das ab mit deinem vorderen ort auff dein rechte seitten, vnnd zeuch deinen rechten schenkel widerumb zurügk, Jnn des scheus Jm deinen Spies auff sein rechte seitten, mit deinem vorderen ort zu seinem gesicht vnd zeuch dich damit zurügk in guter versatzung,