[E]in gut Ringen wen man gen dir get vnd wil dir an setzen so nym dein swert In baid hendt vnd streich Im auf sein schwert bey dem ort mit deim ort vnd In dem streichen vmb drit In vnd setz Im dein arm mit dem swert an sein hals vnd wirff In an den Rucken vber dein pain das setz Im hinten an sein pain vnd thue es Reschlich
- [K]umbt ein gelertter an dich vnd will dir ansetzn sein swert nach Ringen so las dein swert vmb gen In der handt vnd zuck Im sein swert kling[en] mit deinem gehiltz vnd knopff aus der handt vnd In dem zucken far durch mit der rechten handt vnd mit dein swerts kltz fall Im In sein linck knie pug / vnd mit dem lincken arm vnd mit der klingen setz im oben an den hals vnd prich In oben nider vnd wig In vnten auf mit dem gehiltz vnd wirff In an den ruck
[E]In Stuck zu gewappenter handt wen dw zu ainem gest / vnd dich mit Im stichst So drit zu Im gar nahent vnd weis Im den stich aus vnd In dem weisen vnd drit / so las dein swert fallen vn fall zu [?] an Im nider auf ein knie vnd In dem fallen so ergreiff Im sein paide pain mit dein paiden armen vnd zuck in zu dir so velt er an den Rucken
- [A]ber ein gut ansetzen wen zwen baid haben oben an gesetzt / vnd miteinander dringen / so gedenck vnd ergreiff Im sein swert mit deiner lincken handt voren (sic) bey dem ort vnd zuck ein wonig (sic) hinter dich vnd In dem zucken so weis Im sein schwert vbersich aus vnd drit zu Im vnd setz Im ein pain hinter sein licks pain vnd mit der rechten handt prich In oben nider vber das pain an den Ruck
