Page:MS B.26 030r.png

Wiltw aim den degen nemen der dich bey dem Leib an stechen will so fall Im mit deiner Rechten handt Inn sein arm vnd ruck dan die lincken handt wider vnd fall Im In den degen vnd in dem fallen so setz dein Rechten arm vntten an sein handt vnd prich Im den degen vnter sich vber den arm auss

Biltw (sic) aim den degen Nemen der dich vnt[e]n an will stechen / vnd wilt In selber also stechen In dem neme[n] so fal Im mit deiner rechten handt In den arm vnd mit der lincken handt in die klingen vnd prich die klingen gen In vber dein rechten arm aus vnd stoss den mit der Prust den degen In In

WIll man dich stech[e]n vnden auf so fah den stich auf dein rechten arm vnd wint Im sein arm mit deim arm auff den Ruck mit zwaien tritten vnd fall Im dan mit der lincken handt In den and[e]rn arm vnd wurff In auf die erd

EIn hoflich degen nemen mit deim degen will ein[er] ein degen In dich schlahen von oben ein so fah Im den schlag auf deim Rechten arm zw deim degen vnd resch wint Im dein degen klingen vber sein arm vnd greiff mit deiner lincken hant kreutzweis vber dein rechten arm vnd ergreiff dein klingen mit der selbig[en] lincken handt so verpintzt dw Im sein degen vnd handt vnd truck den dein handt mit deim degen nider vnd heb den arm hinten mit dem kreutz auf so muss ern degen fallen laß[e]n od[er] sein arm zwprechen