EIn ander gut ringen wen dw mit aim geleich gefast hast so heb in hinten auff seim Rucken bey seim wames oder der gurtll auf mit voller macht aus den armen vnd In dem aufheben / so lauff mit Im doch [?] zu rad / scheub [vmme] vmb das Im sein fuss die erd nydert [?] vnd wen dw den wilt so schwing Im sein fuss fur auss vnd zuck In oben vber dein rechts pain vnd die huft an sein Ruck / vnd leg In an die erden
- EIn and[er] ringen / wen dw mit ainem gleich gefast hast / welhen arm dw vnter hast / auf der selben seitten leg dein kopff vnd wen dich dunckt das dw es zu weg mugst pringen So fal Im mit der obern handt vmb den hals vnd setz dein fuss vor [?] aus / vnd truck mit dem arm fast zu. so felt er dw must es gar rechlich thun / oder er ergreifft dich bey dem pain vnd tregt dich wo er will
WEn dich ainer also vnter sein vchssen ergreift vnd will dich hart drucken / So mach dich vmb Im ledig Also fall im mit deiner rechten handt zwischen seine pain vnd ergreiff Im sein nirn / vnd truck fast zw So mus er dich lassen
- WEn dich einer ergreifft bey den hoden vnd will dich hart drucken vnd damit notten das [prich] Im also / far mit deinem lincken arm vnter sein Rechten arm damit er dich gefast hat vnd greiff mit deiner Rechten handt dein lincken arm [?] handt / vnd prich Im sein rechten arm vber [?] dein lincken arm / so pricht sein arm ader er muss dich lassen
