 |
You are not currently logged in. Are you accessing the unsecure (http) portal? Click here to switch to the secure portal. |
Page:Cod.10825 015av.png
Der Tolch hatt seinen vrsprůng · von den vrallten Teůtschen · wirt aůch Inn dem gesatz Hermam der Teůtschen Kůnig · pfriemen genannt · vnd ist Inn der not ain ernstliche whör · můß ainnen kecken vnerschrocknen Man haben · hatt vil vortails · so zů der erhalltůng des lebens diennet · Inn sich · diser stůckh send · 44 wie sie dann nachainannder volgen ·
Aůß dem Tolchen kůmbt das Ringen · vnnd werden vast · mit vnd důrch ainannder geregiert vnd gelernet · Inn Sůmma es send gewhören vnd stůckh · die ain grossen ernst Inn sich haben · vnd dem man gar bald den sig · oder den tod fůrdern · diser Ringenstůckh seind · 106 ·
Item der kampff mit der Růndellen · vast aůf Welsche Manier mit dem Rapier · hellt Inn · 46 · stennd ·
Die Mordagst ist aůch gleicherweis von den vorbemellten Amazones erfůnden vnnd gebraůcht worden · vnnd ist ain wůnder zů hören · das soliche zwo ernstliche gewhỏrn · von dem Weiblichen stammen Iren anfanng haben sollen vnnd were mir aůch schier zweifelhafftig zů glaůben · wa nit Aůentiniůs, vnnd anndre · mer glaůbhafftig daůon geschriben hetten · dise Mordagst hellt Inn Ir ernstliche stůckh · 16 ·
Dergleichen wirt der kampff mit der Tartschen vnnd spieß In · 16 · stůcken herfůr gethan ·
Der kampff Im Harnasch zů fůoß hatt 76 stennd ·
