Page:Cod.10825 015ar.png

Regiſter.

Hernacher uolgt das Regiſter, welchs alle Gewheren, wie die in diſem kůnſt fechtbuch nacheinander gerichtet worden ſeind, Inn ſich haltend. U

·1· Das ſchwert iſt das uralt haůbtſtůck, darinnen aůch beỷ Jůden, haiden, unnd Chriſtenn, uil Ritterliche ůbůng, gehalten worden, Unnd noch heůttigis tags die maiſterſchafft dar., rinnen probiert wirt. Inn welichem ·12   ſtend, mit allerlay abwechßlůng, brůchenn unnd hãŵ, nach dem Kůnſtlichiſten, mit Poſſen unnd ſchrifften begriffen ſeind,

·2· Der Tůſſegk, welchen die alten meſſer genant haben, Unnd ſich das redlich Uolck die Spartaner deſſen uaſt gebraůcht, unnd dardůrch groſſe Eer eingelegt haben, hat ſchriftlich und mitt poſſen ·44· ſtend in ſich halten.,

·3· Das Stenglin hat ſeinen urſprůng uon den Rỏmern unnd Perſiern, wirt an ſtat der ſcheftlin gebraůcht, hat gar gůtter ſtend ·22· Inn Im begriffen,

·4· Der lang ſpieß, der Zeit ein pråchtlich fechten, aber an den Jarn nicht uaſt alt, hat in Im mit ſeinem ſtůcken ·    Stend.,

·5· Die hellenbarn gar ein alte wher, haben die kriegßweiber, ſo man Amazones genent hat, erſtlich erfůnden, Iſt mit ·20· gůtten ſtenden beſchriben unnd poſſiert worden,

·6· Es haben die alten ein kůnſt des fechtens mit der Segenß gehalten, hat aůch ſein beſondere uer,,ſatʒůng unnd uortail, hat ·  · Stend In Ir wie geſehen wirt,

·7· Noch iſt ein alte gewher, welche die Sarmati · Hůnos, unnd andere uỏlcker, uor Jarn gebraůchtt haben, der Driſchel genant, helt in Im ·8· ſtůck begriffen,

·8· Die Baůrnſtang iſt ein gewher in der not, Nicht das ainer dardůrch das leben uerliere, aber ʒů ainer gegenwher troſtlich, helt in Ir ·8· ſtůck,

·9· Item wher wider wher, als da ainer den andern etwan angewarnet, oder onůerſehens ůbereilt, gar ernſtlich unnd gůt, helt In Im ·12· Stůck,

·10· Deßgleichen Inn der Sichel aůch, Weliches fechtenn bis Inn ·16· Stůck mit ſich bringet,