Page:Cod.10825 015av.png

·11· Der Tolch hat ſeinen urſprůng uon den urallten Teůtſchen, wirt aůch in dem geſatʒ Hermanni der Teůtſchen künig, pfriemen genant, Unnd iſt in der not ein ernſtliche wher, můß ainen kecken unerſchrocknen mann haben, hat uil uortails, ſo ʒů der erhaltůng des lebens dienet, Inn ſich, Diſer Stůckh ſeind      wie ſie dann nacheinander uolgen,

·12· Aůs dem Tolchen kůmbt das Ringen, unnd werden uaſt mit unnd důrcheinander geregiertt und gelernet, Sůmma, Es ſeind gewhern unnd ſtůck, die ein groſſen ernſt in ſich haben, unnd den Mann gar bald dem ſig oder den tod fůrdern, Diſer Ringenſtůck ſeind ·1

·13· Item der kampff mit der Růndeln, uaſt aůff welſche moniere mitt dem Rappier, helt Inn, Stend     ,.

·14· Die Mordagſt iſt aůch gleicherweiß uon dem uorbemelten Amazones erfůnden unnd gebraůcht worden, unnd iſt ein wůnder ʒů hỏren, Das ſoliche ʒwo ernſtliche gewohern, uon dem weiplich Stammen, Iren anfang haben ſollen, unnd were můr aůch ſchier ʒweiffelhafftig ʒůglaůben, wa nit Auentinius, unnd andere mer, ſo glaůbhafftig daůon geſchriben hetten, Diſe Mordagſt helt in Ir ernſtliche Stůck ·16·

·15· Noch ſeind etliche gůtte Stůck, die den kampff betreffe, unnd groſſe Mannhait anʒaigenn, Erſtlich iſt der kampff ʒů Roß, helt in ſich ·7 · Stůck gar kunſtlich,

·16· Dergleichen wirt der kampff mit der ſchneidenden Tartſchen unnd Spieß, Inn ·16· ſtůcke herfůrgethan,

·17· Der kampff im harnaſch ʒůfůß, hat ·86· Stend,