seiner lincken seitten auß gee. also hastu verwandlet. den vndern schnit. in dem obern. das treib zu baiden seiten. ~
Text.
Zway hengen werden
auß jeden ort auff die erden
in allem gefert.
haw. stich. leger. waich oder hert.
Glosa. Merckh es seind zway henge(n) auß ainer hend vnd von ainer seiten von der erden die treib also: Wenn du Im mit dem vndern gegen deiner linckhen seitten an sein schwert pindest. so heng deinen knopff gegen der Erd. vnd stich Im von vnden auff. auß dem hengen zu dem gesicht. stoßt Er dir denn mit verseczen deinen ort über sich auff. so bleib also am schwert. vnd var auch auff. vnd heng Im den ort von oben nider zu dem gesicht. vnd in den zwain hengen soltu alle gevert. behendigclich treiben. haw. stich vnd schnit. darnach als du dann in dem anpind(en) der schwert empfindest. oder prüfest. ob Er damit waich oder hert ist.
Spirch vester [sic!]. stand froelich besich sein sach. schlach in das Er schnabe. wer sich vor dir zeuchet abe. Jch sag dir fürwar. sich schüczet kain man ane vare. hastu es vernimmen. zu schlag mag Er klain komen.
Glosa. Das spirchvenster mach also. wenn Er dir mit hawen vnd verseczen. an das schwert pindt. so bleib starckh auß geräckhten armen mit der langen schneid am swert. mit dem ort Im vor dem gesicht. vnd stee frölichen vnd besich sein sach. was Er gegen dir treiben will. schlecht Er vom schwert vmb mit einem Oberhaw dir zu. der andern seiten. so pind gegen seinem haw mit sterckh ein Im oben zu dem kopff. slecht Er vom schwert vmb mit der twir. so vall Im mit dem obern schnit in die arm zuckht Er sein schwert an sich. vnd will dir vnden zustechen. so raiß jm nach mit dem ort am schwert. vnd secz Im oben an. will Er sich vom schwert nit ab ziechenn noch vmbschlachen. so arbait dir am schwert mit dem tuplir(n) vnd sonst mit andern geverten. darnach als du empfindest die waich vnd die hert am schwert. ~
