Page:Reichsstadt "Schätze" Nr. 82 008v.jpg

mit dem ort auff der erden. vnd das die kurcz schneid oben gewennt sey.

Item die vierdt ist von tag. da schickh dich also mit. secz den linckhe(n) fuß für. vnd halt dein schwert mit auffgereckhten armen hoch vber das haupt. also stehe in der hutt.

Vier send verseczen.
de die leger auch seer leczen.
vor verseczen(n) huett dich.
geschicht es dir not. es muet dich.

Glosa. das hast vor gehört von den vier hutten. so soltu nun wissen. was da seind die vier verseczen. die die vier leger prechen. wiß das kain verseczen darzu nicht gehört. wann es sey vor haw. die sy prechent.

Item der erst haw. ist der krumphaw. vnd pricht die hutt des Ochsen. der ander die twir. vnd pricht die hutt vom tag. der drit ist der schiler. vnd pricht den pflug. Der viert ist der schaitler vnd pricht die hutt Alber. Vnd wie du die vier Hutt mit dem hawen prechen solt. das vindestu da vorn in den. hawen geschriben. Dar umb huet dich das du mit nit verseczest wilt du nit geschlagen werden. ~

Ob dir verseczt ist. vnd wie das komen ist. hör was ich dir Rath reiß ab haw schnell mit drat. Glosa. wenn dir ainer ver: seczt hat. vnd will sich vor dem schwert nit abziehen. vnd maint er well dich zu kainem stuckhen lassen komen. so thue als du dich von dem schwert wellest ab ziechen. vnd zuck dein schwert an dich biß zu halber klingen. vnd var damit bald am schwert wider auff. vnd haw Im schnell mit dem dupliern. oder mit der kurczen schneid zu dem kopff.

Iten ein anders. wenn Er dir verseczt hat. so reiß mit deinem schwert an seiner schwerts klingen vbersich auff gen(n) seinem ort. als du Im oben welst abnehmen vnd bleib am