Page:MS 3227a 12r.jpg

¶ Wiltu dy herte von dem eizen entloezen so nym menschen blut / und los das sten bis das wasser dorof stet und wirt / zo seige denne das wasser in eyn glas und halt das / und wen du denne dy herte entloesen wilt / zo nym das geherte wofen und halt das czu dem fewer bis das is zo heis werde das is das wasser slinde / Zo strich das wasser mit eyner veder an dy sneide zo entlet sich dy herte und wirt linder /

¶ Item wiltu eisen weich machen und czehe / zo nym comomillen blumen eynteil / und eyn teil kranches snabel das hat bloe bluten und eynteil veitbomes / und das lege alles mit eynnander / in heis wasser / und tu is in eynen top / und decke is / das der brodem nicht aus moege gen und las is wol siden Dorynne lesche glueende eisen / das wirt gar weich und czehe /

¶ Item wiltu eizen weich machen / zo nym horn und schabe das of eyn leder und menge das mit sal armoniaco / und seiche dorof / und winde das uem das eisen und laz das leder alzo of dem eisen vorbrueen zo wirt is weich /