Page:Cod.I.6.2º.5 35r.jpg

auch hergegen also von deiner lincken mit dem rechten vor und ym stoβ trit zw ym mit linckem fues und die swert anainander klitzen So mögent ir baid gegenainander winden so kummet ir baid krump in die arbait darnach krieg und arbait wie dw wilt ir mügent auch baid ain verzucken daraus machen mit ainem schlag herumb auf sein rechte achsel im zw seiner lincken seitten zw dem haubt oder ainen underschnidt nemen etc Welcher will dupliren oder mutiren

Die ander inner myn ist so er stet mit dem lincken fues vor und helt sein swert wie vor doch auf der seittn muβ es krump sein so treib die arbait gen ym wie vor am nechsten Wann das es verkert ist nach der seitten So dw ym aber die zucken prechen wilt so mutier oder duplier wie es füeg am besten nach der arbait oder seitten so wirt er tawb geschlagen etc oder schneid Dw magst auch wie vor ob dw nit die gegen myn prauchen wilt die stendt oder myn mit anderen dingen dargegen arbaiten als mit der twir oder zornhaw oder anderen absetzen oder aufsitzen und arbaiten wie dw wilt etc Also hastu die vier myn ausgelegt mit iren arbaiten wie dw die beginnen solt Die gemainen glosen legen anderst aus aber es gefelt mir nit etc Die arbait mag der ander gegen dir auch treiben

Von dem fülen und dem wort indes ain lere

Das fulen lere indes das wort schneidet sere /

Glosa Das ist das dw das wort indes wol lernen und versteen solt wann die zway ding gehören zesamen und mag ains an das andert nit gsein und send die grosse kunst zw dem vechten Das vernym also wann ainer dem anderen an das swert pindet So soltu in dem als die swert zw samen klitzen zwhandt fülen oder empfinden ob er waich oder herrt angebunden hab Und als dw das empfunden hast so gedenck an das wort indes das ist das dw in dem selbigen empfinden behentlich nach der waich oder der herte arbaiten solt zw der nechsten plös so wirt er gern geschlagen ee er sein gewar wirt Item dw solt an das wort indes in allen anbinden des swertes gedenckenn wann indes duplirt indes mutirt indes laufft indes wechselt durch indes nymbt den schnidt indes ringet mit indess