linckenn fus, wider ansetzest oder begreiffest mitt ringenn.
Das ist der Text vonn Nachreissen mit dem schwert tzu kampf.
Folg allen treffenn,
den starcken wiltu sie effenn
Wert er so tzuck,
stich wert er Jo zu im ruck,
ob er lanngk ficht,
so bistu kinstlich bericht.
Glosa. Merck die Nachraysenn soltu treiben gegen denn starckenn, die da lang vnnd weit fechtenn, vnnd wollenn sonst vonn Rechter kunst nit halten,
Item gegenn denn schick dich also, leg dich gegen Im in ein hut, legt er sich den auch in ein, so merck ebenn, wenn er sein schwert an sich tzeucht, vnnd wil stechenn oder aufhebt, vnnd wil schlagen so folg im bald nach mit dem ort, tzu der nechsten ploß ee wenn er denn stich oder den schlag verpringt, Wirt er denn des ansetzens gewar, vnnd versetzt aber weit mit dem schwert, vnnd sucht ann dir kein ploß mit dem ort, so tzuck aber durch, vnnd das tzuckenn treib alweg, als oft er dir mit der
