In sein gesicht vnd prich ÿm mit deiner lincken hant sein lincke vber dein swertz klingen
Ein Annders
Oder stich ÿm mit paiden henden oben durch zwischen dem swert vnd seiner vorgesatzten hant vnd druck den knopf gegen der erden vnd wind den ort an seinem swert gegen seiner rechtñ seittñ vnd setz ym an
Aber ein losung
wenn er dir hat an gesetzt vnd dringt So stich yn vnden in den tenär der hant do er sein swert in der mitt peÿ hëldet
Oder hat er die hant vmb gewäntt so stich yn dar ein von oben nÿder vnd wenn der stich hafft So für In do mit zw dem kraiss
Ein anders
Oder stich yn auswendig des arm~s do er das swert in der mitt peÿ hellt hinden in den hantschuech vnd wenn der stich hafft So lauf mit der hant für dich zw dem kraiss Do mit gewingstu ym auch die seitt an vnd andrew grosse vortail
Aber ein losüng
Merck hat er dir an gesetzt an dein lincke achsel vnd dw Im wider an die sein So tritt zw ruck mit dem lincken fuess vnd wendt dein lincke seitt auch von ÿm So hafft dein ort vnd der sein nicht
Oder hat er dir gesatzt an dein rechte achsel vnd dw Im wider an die sein So trit zw ruck mit dem rechten fuess so hafft aber dein ort vnd der sein nicht
Aber ein losung
Merck wenn er dir hat gesetzt an dein lincke achsel vnd du ÿm wider an die sein So ruck deinen knopf vorñ an dein prust vnd dring also für dich So hastu ÿn vberlengt ~
