Page:Cod.44.A.8 040av.jpg

sein rechte hant mit deiner rechten vnd wurff In mit dem vngenanten griff oder mit dem verporgen grieff vnd wie dw die tzwaÿ ringen treiben solt das vindestu hernach geschriben

Hie merck ein swert nemen

Merck wenn du mit der lincken seitten kumpst an sein rechte hat er denn dein swert getzogen vnd vert auff mit dem arm~ vnd wil dich slahen So begreiff mit der lincken hannt sein rechten arm~ hinder dem elpogen vnd stos In do mit oben von dir vñ erheb vnden mit dem lincken fuess sein rechtñ vnder dem steickleder vnd begreiff mit der rechtñ hant sein swert peÿ dem knopf vnd ruck es do mit zw° dir So nÿmpstu Im das swert vnd stos in also dar zw° vom ross Das lert die drit figur Die spricht also mit straiffen satelrim oder wer nÿmpt

Merck wenn dw mit der rechten seitten kumpst an sein rechte so treib die hernach geschriben Ringen

Merck wenn ir paid vorfelt habt mit den glefen magstu deñ mit der lincken seitten nicht kumen an sein rechte so halt vnd wurff In mit dem sunnen zaigen oder mit dem schaffgriff vnd wie dw die zwai ringen treiben solt das vindestu hernach geschriebën

Aber ein ringen

Merck wenn du kumpst mit der rechten seitten an sein rechte hat er denn sein swert gezogen vnd