Page:Cod.icon. 393 I 096v.jpg

De Fenestra Patula

Supra commemoratum est, qua ratione in quatuor praedictas custodias ense regendo Athletice te componere necesse sit. Nunc igitur intelligas eum habitum, quo de agimus, esse custodiam, qua tutissime consistere poteris, custodia autem ipsus mucro est, de acie longa, hic enim optima ensis pars est, et nobilissima: si qui igitur ex eo atleticam rite exerceant, eo compellunt adversarius, ut etiam inviti vulnerentur.

Fenestram autem patulam hoc modo formabis. Si in conspectum adversarii ense rite gubernando processeris, exercens ictum quemqunque, sive supero sive infero, tum subinde mucronem longum brachiis porrectis pariter ex ictu, iniicias contra hostis faciem vel pectus, atque ea conditione eum urgebis ad se defendendum, vel ut ensem tuum in primo congressu feriat, id igitur si fecerit, acie ensis tui longa acriter eius ensi inhaereat; atque interim animo forti et indefesso diligenter perspicias, quos habitus adversarius exercere velit, si ab ense tuo recesserit hostis tu mucrone subsequutus, visum vel pectus eius adpetito. Sin vero ex primi congressus coruscatione alterum latus tuum ferire conetur, rursus firmiter brachia adversarii proscindas, atque contra eius caput caput naviter laborato. Verum si adversarius neque ab ense tuo recedere, neque latus alterum ferire voluerit, tum utitor duplationibus vel aliis quibusvis habitibus iuxta sentias eum fortiter vel infirmter tenere ensem.

Mucro longus longe omnium optimus habitus est, nanque eo ipso eo adversarius compellitur, si instes, ut nec ullos habitus exercere quaet, quocirca in omnibus ictibus eum exerceas contra ipsius faciem vel pectus, atque inde porro varios habitus formes.

Etiam isthuc Fenestra Patula adpellatur: cum ferme in conspectum adversarii fieris progressus, sinistrum pedem praeponas, atque mucronem longum brachiis porrectis contra adversarii faciem vel pectus protendas, priusquam eius ensem contigeris, eaque ratione consistas quid ferire, vel quos habitus contra te sit usurpaturus prospectans. Cum superne feriat, tum sublato ense eum contra ictum ipsius convertas in Bovis habitum, et inde visum pungas. Sin autem ensem tamtum ferire studeat corpore neglecto, audacter transmutato et alterum latus pungito. Sin autem incurrat elevatis brachiis, infernam incisionem usurpato, at si ea demiserit, luctari poteris. Ea itaque ratione quoscunque habitus per brachia usurpare licebit, qui tibi optimi videbuntur.