Page:MS Germ.Quart.2020 019r.jpg

Eyn anders

Den krumphau magstu auch treiben aus der schranckhut, von paiden seitn, Unnd in die hut schichkh dich also, wen du mit dem zufechtenn zu im kumpst, so stee mit dem lincken fus for, unnd halt dein schwert mit dem ort nebn deiner rechten seytn, auf der erdn, das die lang schneid oben sey, und gib dich plos mit der lincken seyten, Haut er dir dan zu der plos, so spring aus dem hau gegen im mit dem rechten fues, wol auf dein rechte seiten, Und schlag in mit gekreutzten henden, aus der langen schneid mit dem ort auf sein hende

Von der Schranckhut

Also schick dich in die schranckhut, zu deiner lincken seiten, wen du mit dem zuvechten zu im kumpst, so stee mit dem rechtenn fus vor, und halt dein schwert nebenn deiner lincken seiten, auf der erden mit gekreutztn henden, das die kurtz schneid oben sei, und gib dich plos mit der rechten seyten, Haut er dir den zu der plos, so spring aus dem hau gegen im mit dem lincken vus wol auf sein rechte seyten, und schlag in im sprung mit der kurtzen schneiden uber die hend