Der scheitler pricht die hut die do heist alber und ist dar zu dem antzlig unnd der prust geferlich mit seiner ker,
Den treib also
wenn du mit dem zufechten zu im kumpst, legt er sich dan gegn dir in die hut Alber so setz den lincken vues vor unnd halt dein schwert an deiner rechtenn achsell yn der hut und spring zu im unnd hau mit der langn schneid von obn nider starck, im zu dem kopf
versetzt er den hau das sein ort und das ein gehultz paide uber sich steenn das selb heist die Kron, so pleib hoch mit den armenn unnd heb mit der linckn hant deinen schwertz knopf uber sich unnd senck im den ort uber sein gehultz zu der prust vert er denn auf mit dem schwert unnd stost dir den ort mit dem gehultz uber sich, so wind dein schwert under seiner kronn durch mit dem schnit in sein arm und druck also ist die kron wider geprochn, und mit dem druckn so schneid vast in die arm und zeuch dich mit dem schnit ab,
