Page:MS 26-232 108r.png

Das Ist der text

Merck will er ziehenn
von scheydenn vnnd will er fliehenn
so soltu Im nahen
Ja werflich ward des vahenn

Glosa merck das Ist das dw solt nachreysenn mit dem Sper merck wen dw vor komst mit dem stich versetzt er vnnd will sich vom Sper abziehenn So volg Ime nach mit dem ortt Triffstu In damit So tring In fur dich will Er dan auß dem ortt hinter sich fliehenn vnd meint dir zw ein seytten So wartt das dw Ime zw der selbigen seytten ein lawffest vnd In weißlich begreiffest mit ring vnnd mit arm pruchenn als dw her nach geschribenn vindest

Das Ist der text vonn Ringenn zw kampff

Ob dw wilt ringen
hinter pein Recht lere Springen
rigel fur schiessenn
das vorpein kunstlich beschliessen

Glosa merck das Ist wen dw mit Ime komest zw Ringenn So soltu wissen wie dw von oder hinden fur das pein springenn solt das er hatt vor gesetzt vnd das sol geschehenn vnnd nit mer dan mit eynem zw dritt

Item merck dem thw also wen dw Ine angreiffest mit Ringenn vnd er dich wider So sich welchenn fus er vorsetzt hatt er den linkenn fus vor so schlag So schlag Im den linken fus auß hand auß mit deyner Rechten vnd mit dem auß schlahenn so spring mit deynem rechten hinter seynen linken fus vnnd druck In mit deynem rechten knye In sein linke