Page:MS 26-232 105v.png

wartt das dw Ee Scheust dan er vnd volg bald dem Schuß nach zw Ime mitt dem Schwertt So kan er keynen gewissen Schus auff dich habenn vnnd zw Ime mitt dem Schwertt

Merck dw ob dw dein Sper nit verschiessenn wild So haltt Es nebenn deyner rechten seyten In der vndern hutt vnnd gee also zw Ime vnd Stich in kunlich von vnnden auff zw dem gesicht Ee wen er dir | sticht er den zw kampff Doch So gedenck das dw alweg vor kompst den er es sey mitt eynem Slag oder mit eynem Stich So muß er dir versetzen vnnd als bald er mit der versatzung an das Swertt bindt So treib dein stuck behendiglich So mag er vor deyner arbeitt zw seynen Stucken nit komen vnd das heist das vor

Item hie merck was da heist das nach das sind die bruch wider alle Stuck die er auff dich treibt vnnd das vernim also kompt er vor das dw Ime versetzen must So such zw hand mit der versatzung mit dem ortt die nachst Blos so gewinstu die arbeitt mit deyner versatzung vnd das heist das nach

Item hie soltu merckenn das In dem kampff vechten nicht mer soll sein denn ein arbeitt vnd ein zw tritt vnd das vermein also vbereilt er dich das dw zw keyner versatzung komen magst So soltu newer Ein tritt zw Ruck thün mit dem linkenn fus vnd wartt weyßlich das dw Ime mit eynem zw tritt des linkenn fus wider ansetzest oder begreiffest mitt Ringen

Das Ist der text von nach Reyssen mit dem Swert zw kempffen