Page:MS 26-232 109r.png

In die obern hutt so leg das Schwertt fur dich auff dein lincks knye In die hutt

Item oder Sticht er dir vnndenn zw So setz den Stich ab vor deyner linkenn hand vnd Spring mit dem Rechten hinter seynen linkenn vnd far Im mit dem knopff forn vber sein Rechte achssell vmb den hals vnd wurff In vbers knye

Sticht er dir dan mit der gleuen oben zw so far auff vnd setz Im den Stich ab vor deyner linkenn hand mit dem Schwertt auff linke seytten vnd Spring zw Im vnd wartt des ansetzenn magstu dar zw nit kumen So las dein Schwertt vallen vnnd wartt der Ringen

Das ist der text vonn absetzenn mit lerer hannd

Linck lanck von hand
Spring weyßlich vnnd den vach
Ob er will zuckenn
von scheydenn vach vnd druck In
das In die plos
mit Schwertes ortt verdroß

Glosa Merck das Ist wen dw steest In der vntern hutt Sticht er dir dan obenn zw mit dem Sper vnd hatt das gefast das Im der ortt fur die hanndt auß geet So Schlag Inne mit der Schwert beseyt ab vnd begreiff dein Schwertt bald wider mit der linkenn hand mitten In der clingenn vnd Spring zw Im vnd setz Im ann

Item oder Sticht er dir mit dem Sper vndenn zw dem gemecht So vach sein Sper In die linkenn hand vnd halt es damit vaste vnd Sticht Im mit der Rechtenn vnnden zw dem gemecht vnd Ruck er dan sein Sper vast an sich vnd will dir das auß der hand reyssen So las das Sper vrbering auß der hand farn So gibt er sich plos So begreiffe sein Schwertt bald mit der linkenn hand wider mitten In der klingenn