Aber ain Leibringen.
Item Wan du dich mit ainem gefasst hast, bej den armen, alls oben geschriben steet, vnnd iener ist starck, vnnd druckt dich fasst zu ime so setz ime den elenbogen an die Keelen, vnnd druck damit fasst, das thu mit der hannd, die du oben hast, so muß er dich lassen.
Ein annder geförrt.
Item ob dich ainer hat gefasst, vnndter deinen armen, vnnd druckt dich fasst zu ime, mit sterck, vnnd thut dir wer, so brich dich allso von ime greiffe mit bede daumen zu die augen, oder vnndter seinen kinbacken, oder mit beden daumen in sein keelen, so muß er dich lassen.
Ein annders.
Item hastu dich aber mit ainem gefasst, alls vorgeschriben steet, so fare ime mit deinem arm, den du oben hast, vnndter den kinbacken an den halß, vnnd stoß in fasst von dir, vnnd mit der hannd, die du vnndten hast , Begreif ime das bain, in der kniebügen, vnnd zuck damit zu dir, so wird er geworffen.
Nota
Item ob dir ainer das brechen wolt, vnnd das ge=
