Page:Cod.44.A.8 060v.jpg

peug das knÿe fur dich So mag er dir mit dem stoss zw dem knÿe nicht geschaden ~

Aber ein ringen

Merck wenn dw mit ÿm ringen wild greifft d er denn nach dir mit gerackten fingerñ oder mit offen henden oder begreifft dich mit ringen vnd helt dich nicht fest So wart ob dw In peÿ einem vinger begreiffen magst vnd prich ym den vber sich vnd für In do mit zu° kraiß do mit gewingstu Im auch die seitt an vnd sünst ander gross vortail ~

Das ist ein arm~pru°ch

·M·erck würfstu In nider vnd er velt auf den pauch vnd reckt sein arm~ von ÿm So knÿe ym pald mit einem knÿe auff einen arm~ in sein gelenck des elpogens vnd begreif ym den selbigen arm~ vorñ mit deiner hant vnd ruck do mit über sich So prichstu ÿm den arm~ ~

Ein vnderhalden vnd ein arm~pru°ch

Merck würfstu In nÿder vnd er velt auf den pauch So sitz pald hinden auf ÿn vñ begreiff yn peÿ einem arm~ vnd zeuch Im den auf seinen ruck vnd halt den fest mit einer hant So kan er nicht auff kömen Oder wiltu Im den arm~ prechñ den dw Im heldest mit der ain hant So heb mit der anderñ hant den selbigen elpogen vast vbersich So prichstu ym