Page:Cod.44.A.8 042v.jpg

dir zw° dem gesicht So var auff vnd vor setz das dein ort ste gegen seiner rechtñ seitten vnd stich Im Inndes zw° dem gesicht vor setzt er denn stich vnd vert do mit hoch auf So haw In mit der langen schneid nach dem zawm oder nach der lincken hant ·Oder Ob dich das ros vertrüg so häw Im nach dem rechten pain in dem hÿn rennen Das lert die sibent figur Die spricht also hie heb an den mañ taschen haw zw° su°chen

Hie merck den text vnd die glos wie dw den man am swert twingen solt zw° Ross

lere wol starck schütten
allen treffen an far do mit nott In
Setz an anfär
heng Im zwm har

Glosa Merck das ist da dw Im mit allen häwen vnd in allen geferten albeg starck solt an pinden an sein swert vnd In am swert nöten vnd twinge mit dem ort vnd künleich versuechen ob dw In magst an gesetzen vor setzt er vnd reitt do mit nahen an dich so var mit deinem knopf von vnden auff durch sein swert Im vber sein lincke achsel vmb den hals vnd kum mit der lincken hant hinder seinem ruck deinem knopf zu° hilff vnd zeuch in für dich auff die seitten Das lert die sechst figur Die spricht also das schütten vor genck allen trefften treffen hawen vnd stechen

Das Ist ein anders stuck

Merck wenn du im ein haust vor setzt er