Page:MS 26-232 114v.png

Die verfurgunge

Wer dir denn Stich also will versetzenn so schlag den degen zw dem arm / vnd far vnden durch vnd far Im durch denn hals mit dem tegenn vnd heb mit deiner linken hand sein linck pein vnd wurff In

Ein pruch auff das

Der dich also will verfurn vnd will dir vmb den hals farn So wart auff den Elnpogenn stoß den vbersich vnd nim Im dar [!] recht pein vnd würff In

Der ober Stich

Der auff dich Sticht den vber sticht so ste mit dem linkenn fus vor vnd versetz Im Starck von der Brust mit der linkenn hand vnd mit deinem Rechten arm vall Im In den elpogen vnd zeuch an dich vnd mit deiner linkenn hand truck oben von dir so pricht Im der arm

Der ander

Sticht er den obern stich das versetz Im Starck von der Brust mit der linken hand vnd pleib also In der versatzunge vnd mit deiner linken hand greiff lanck vber vnder sein Rechten arm durch bis an dein linke hand / vnd druck Ime sein linken arm vnd Ruck so pricht Im der arm auch magstu dein linke hand lassenn farn vnd nim den tegenn auß dem selbenn Stuck

Ein ander

Sticht er aber obersich als vor versetzt Im mit der linkenn hand Starck von der Brust als vor vnd mit der versatzung far vber sein arm das dein linke hand kum wider an dein Brust so hastu Inn gefangenn