Page:Cod.icon. 393 I 097r.jpg

De Intorsionibus Ensis

In iis habitibus singulis sis exercitatus, eos celeriter ut possis exercere, atque adversarii impetum omnem, quo contra te utatur, removere prudenter queas. Etiam noris inclinationum genera quattuor esse, supernas duas, atque duas itidem infernas. Supernae quidem Bos dicuntur, infernae autem Aratrum utrinque. Verum ex quattuor praedictis inclinationibus octo intorsiones formantur, idque diligenter observes, ut ex qualibet intorsione singulariter unum ictum, punctionem, atque incisionem producas.

Iam vero percipies, quo pacto ex quatuor inclinationibus octo intorsiones formare possis, Prima duas habet intorsiones, eas igitur hac subsequenti ratione exerceas. Cum ense tuo Athleticae regendo ad hostem concesseris, de latere dextro consistas in Bovis habitu, et si is superne versus latus tuum sinistrum feriat, tum obviam ictui eius, ensem torqueas, ita ut aciem brevem tui ensis, eius gladio applices, in habitu Bovis, atque inde visum pungere non dubites, et is habitus dicitur intorsio. Sin autem adversarius eum impetum removere conetur de latere sinistro, ensis tuus ensi eius adiunctus remaneat, atque rursum ensem inde torqueas in latus tuum dexrum in habitum Bovis, ut acies longa, ipsius ensem contingat, rursumque superne faciem hostis fodito, et is habitus dicitur inclinatio ex latere dextro adhibitis duabus intorsionibus in hostis ense.

Secundam ensus superiniectionem hac ratione exerceto additis duabus aliis. Si in conspectum adversarii fueris progressus, de latere sinistro in Bovis habitu consistas: et si hostis superne contra latus dextrum tuum feriat, tum aciem ensis tui longam ipsius ensi adplices, atque superne visum ipsius pungas, et is habitus intorsio est, sin autem punctionem eam repellat versum latus suum dextrum, remaneas ab ipsius ense haerens, inde autem subito rursus in latus sinistrum ensem torqueas in habitum Bovis, ita ut brevis acies adversarii ensi adplicetur, atque ex hac forma visum hostis pungas, idque est secunda superiniectio de latero sinistro adhibitis rursum duabus in ense hostis intorsionibus.

Observandum tibi insuper erit, ex duabus infernis proclinationibus itidem quatuor intorsiones exercendas esse, quod est Aratrum utrinque, ut super memoratum est, adhibitis earum habitibus singulis ex superno ictu formatis. Quoties igitur cunque intorsionum generibus voles uti semper ictus, punctionis, atque incisionis memor esto, quos habitus usurpare ut supra dictum est, oportet.