Page:Cod.icon. 393 II 085r.jpg

Aversionis effigies contra plaga[m] letalem per securim.

Dextrum pedem in congressu contra hostem praeponito, supra caput tuum securim utrisque manibus teneto, atque mucronem porrectim adversus hostem. At si contra te is sinistrum pedem praefixerit, et caput tuum plaga letali concutere conetur, tum securi tua ea removeas in latus sinistrum. Inde autem retracta securi, pubem adversarii figas. Eodem vero habitu hoste utente, posteriori securis mucrone eam vim repellas. Post autem insequutus pede dextro lamina securis tuae faciem ipsius saucies. Verum si adversarius eum impetum hastili securis removeat intra manum utramque, mucronem posteriorem intorqueas intra brachium utrumque contra hostilem faciem. Eodem modo si is te adgreditur, dextrum pedem referto, atque hastili intra utramque manum hostem excipito. Sed si eveniat ut tuam vim excipiat, tu repente supernam nuditatem adpetas feriundo. Cum vero hostis te feriundo adgredi molitur, capulo tuae securis eum repellas. Inde si in latus dextrum tuum convulseris, faciem eius pungas mucrone, inde autem securi circumrotata recedas.