Page:MS Bibl. 2465 057r.jpg

Bleych stehen Im Nachreysenn

Item so Ihr beyd In der eysen pfort stehet, so hab acht, als baldt er von seiner hut abgehet zum stich, so tritte aus seim stich, vnd volg behendt mit dem ort zur blöß, von welcher er abgeht, vnd stich gleich mit Ihm hinein.

Nachreyssenn

Dieses ist eyn listige behende arbeyt Im Rappir, dann so offt er sein weher etwas neben seyner Rechtenn hatt, als baldt er mit dem gefaß abgeht, so stich Im behendiglich daselbsten hineyn von welcher er abgeht.

Nachhaw von vndenn.

Stehest du In der eysen pfort, vnd eyner sticht dir zu deiner lincken, so dempff Im von oben wie oben gelehrt, In des heb dein gefaß vbersich In lincken ochsen vnd haw behendt mit kurtzer schneidt von vnder durch sein Rechten darnach stich durch eyn Mittelhaw, vber dein handt. ⁋

Item sticht dir eyner zu deiner Rechten so dempffe von deiner lincken zu deiner Rechtenn so kompst du In rechtenn pflug, stich Im aus dem pflug übersich zum gesicht, das muß er wehrenn, haw In des behendt eyn vnderhaw von deiner Rechten durch sein Lincken vnd stich Im vber die handt zum gesicht

Nebenhut

Die neben hut mach also: stehe mit dem Rechten vor, halt dein wehr, neben deiner linckenn hüfft das dein spitz hinden aussihet zum streych.