Page:MS Bibl. 2465 080r.jpg

zu dir, durch die forder handt, vnd stoß mit starcker versatzung von deiner brust zu seim gesicht, Merck wan du einem anbindest von deiner Rechten, so stoß ihm vbersich zum gesicht doch fell, als baldt laß den orth vndersich sincken neben seiner rechten, vnd wechsel durch vnd heb Indes den hindern orth vbersich vnd stich von oben nach seiner hifft, zuck die stangen vmb den kopf vnd schlag nach oder so er dir zum gesicht stost dieweil du dein forder orth vnder seim arm hast so wendt Im den stos vbersich ab vnd stos nach. ⁋

Zwirgstich

Merck bindt einem ahn von deiner Rechten gegen seiner Lincken, Zuck mit beiden armen dein stang vmb dein haubt, das die stang neben der Lincken wider vmb fliegt gleich einer zwirch, so blossest damit dein gesicht, so nim ihm den stoß auß von deiner lincken gegen deiner Rechten, das In der versatzung dein hinderhandt hoch ab dem haubt, sey, vnd das forder orth vndersich gegen der erden hang, gleich dem verhengen, Windt ihm als dhan den stoß vnder deiner handt In sein gesicht. ⁋