Page:Cod.10825 103r.png

Ein schaitelhaw mit ainem abnemen

Item: wann du mit dem zufechten zu dem ajann kumpst, so schich dich also Inn den schaitelhaw, stee mit deinnem rechten fuoss vor unnd haw mit gestreckem arm nach seinnem haupt, hawt Er dir also gerad oben ein und du mit deinnem lincken fuoss vor steest, so haw auch gleich mit Im ein und Inn dem einhawen, so grief Im mit deinner linncken hand nach seinner rechten, so magstu deinnem abnemen nach komen unnd magst Im denn schaitelhaw zu seinnem haupt fiern, hat er dir also abgenommen und schaitelt dir, so trit mit deinnem lincken fuoss fur seinner rechten und begreiff Im mit deiner linncken hand sein recht vornen bey dem duseggen, so magstu In durch das angsticht Schneiden, begert Er dich also durch das angesticht zu schneiden, so trit mit deinnem lincken fuoss hindersich unnd wind dich auf mit deinnem duseggen auff dein rechte seitten das die lanng schneid oben setze, haw Indes behend auf sein lincken seitten, versezt er dir das, so spring mit deinnem rechten fuoss auf sein rechten seitten und haw Im mit ainnem dopelten creizhaw nach seinnem haupt