Page:Cod.44.A.8 051v.jpg

swert vnd setz ÿm an oder sticht er dir zu° dem gesicht So var auf gegen dem stich vnd wind Im den ort oben ein zu° dem gesicht oder kumpt er do mit nahent an dich so wart der ringen ~

Aber ein stuck

Merck reittestu mit halbem swert zw seiner lincken seitten Sticht er dir denn zu° dem leib So var auff mit dem knopf gegen deiner lincken seitten vnd lass die klingen neben dir nÿder hangen auch zw deiner lincken vnd setz Im den stich also ab mit dem kurtzen swert vnd setz Im an ~

Aber ein stuck

M·erck reittestu Im mit halben swertt zw seiner lincken seitten haut er dir denn oben ein zu° dem kopf So vor setz zwischñ paiden henden In das swert vnd las das swert auß der rechten hant vnd kum do mit der lincken zu° hilff mitten in die klingen vnd slach In mit dem knopff zw dem haupt oder zw dem lincken elpogen ~

Aber ein Stuck

Merck wenn dw Im mit halbm~ swert reittest zw seiner ki lincken seitten haut er dir denn oben ein zu° dem kopf So vor setz zwischen deinenn henden in die klingen vnd begreiff In der vor satzung mit der lincken hant deine~ swertz knopf vnd slach In mit eine~ freÿen ober haw