So ist der haw falsch und ungerecht Wann dein rechte seitten pleibt da hinden so ist der haw zekurtz und mag sein rechten gang undersich zw der andern seitten vor dem lincken fueβ nit gehaben Desgleichen wan dw hawst von der glincken seitten und dein haw nit nachvolget mit dem glincken fueβ so ist der haw auch falcsh Darumb merck von welcher seitten dw hawest das dw mit dem selben fueβ dem haw nachvolgest so magstu mit sterck alle deine stuck gerecht treiben und also sollen auch all ander hew gehawen werdenn
- Aber Ain text von ainer lere
Wer nachgeet hawen / der bedarff sich kunst wenig frawen / Haw nachent was dw wilt / kain durchwechsel kumpt an deinen schilt / zw kopf zw leib / die zeck nit vermeid / Mit gantzem leibe vicht was dw starck gerest treiben / Glosa
Wann dw mit dem zuvechten zw ainem kumbst so soltu auff seinen haw nit sehen noch warten wie er die gegen dir treibt Wann all vechter die da sehen und warten auff aines andern haw und wöllent anderst nicht thun dann versetzen die sollen sich solcher kunst wenig freyen wann die werden da bey offt geschlagen Darumb schlah und stich die plösse Item auch merck Alles das dw vechten wilt das treib mit gantzer sterck deines leibs und haw damit nahent ein zw kopf und zw leib So mag er vor deinem ort nit durchwechseln Und mit dem haw solt in dem anpinden des swertz der zeck nit vermeiden zw der nechsten plösse Die hernach in den fünf hewen und andern stucken aufgericht werden
- Aber ain text ainer lere
Hör was da schlecht ist / sicht nit oben linck so dw unden recht bist / und ob dw glinck bist / im rechten auch ser hinckest / Glosa
Die lere trifft an zwo person ainen lincken und ainen rechten das vernym also wann dw mit ainem zuvechten kummest bistu gerecht und vermainst den man zeschlagen so haw den ersten haw nit von der lincken seitten wann der ist schwach und magst domit nit widerhalten wann man dir starck darauff
