- Wie man die vier plössen prechen soll
Wiltu dich rechen / die vier plössen künstlichen prechen / Oben duplier nyden recht mutier / Ich sag dir fürbar sich schützt kain man anefar / Hastu sy vernomen / zw schlag mag er klaine kumen / Glosa
Als maister hans niedl sagt ist So dw mit ainem auβ oberen ernstlichen hewen oder sunst angepunden hast und dich rechen wilt und die plöss darzwe er dir schlagen wolt versetzt hast und gebrochenn schlecht er dann widerumb dir zw der anderen seitten zw der anderen plösse deines haubtz mit abnemen oder sunst So soltu im die plöss aber prechen das ist mit dem duplieren und mutieren schlagen So prichstu die plössen von ainer seitten zu der anderen und wirt geschlagen und dw versetzst und schlechst ains mals on schadenn
Hie merck wie du Das duplieren treiben solt zu beyde seyten
Das duplieren soltu also machen wann er dir von seiner rechten seitten mit ainem oberhaw oder sunst dir anpunden hat dir zw deiner lincken etc Und schlecht dir herumb wider zw deiner rechten seitten
So thue nit mer als pald dw das empfindest die weil er schlecht so wind under seinen swert dein swert mit kurtzer schneid im neben ein zw dem kopf auf sein lincke seitten so wirt er geschlagen und ist dem verpinden oder zulegen gleich Das haist dan oben duplirt und domit die plossen prochen Auch magstu das duplieren gegen seiner rechten seitten auch machen doch mustu krump einwinden etc
Ob er nach deinen duplieren wolte widerumb schlahen dir zw deiner linken seitten zw deinem haubt so mutier im zw seiner rechten
Hie merck wie du Das mutieren treiben solt zu beyden seyten
Das mutieren mach also So dw im oben ein duplirt hast und die ploss gebrochen wie oben gelert ist Wolt er dann herwiderumb schlahen dir zw deiner lincken seitten etc Ob aber er nit herwider schlahen wolt so magstu nichtz minder zwischen durchlassen geen wie oben etc
So lass resch dein ort zwischen ewr baider herdurch geen Unnd schlag im zw der anderen ploss des kopfs seiner rechten seitten Schlecht er dan dir aus dem selben zw den undern plössen So wind dw alweg mit deinem swert oder ort unden herwider So brichstu ym also alle plosse das er nit wais fürbar wo er ist anefar und nit wol zu schlegen kummen mag das haist niden recht mutirt und die plossen künstlichen prochenn und gerochen Also sagt maister hanns niedl von Saltzpurg
