- Ain ander stuck
Was sich wol twieret mit springen dein handt geferet
Das ist wann dw stest in der twir und wilt seinen handt geferen mit schlagen So laβ in deim(sic) twirhaw gegen deiner lincken seitten durchgeen den ort und im durchgen so spring oder schreit im wol auf sein lincke seitten mit deinem rechten fues und schlag ym mit der twir gefarlich zw seinem haubt seiner lincken seitten mit kurtzer schneid doch das dw in dem mit dem swert oder gehiltz wol bedeckt seiest krieg Gleich also get es auch auf der lincken seitten mit durchgen und schlagen zw seiner rechten seitten mit langer schneid etc
- Ain ander stuck aus dem Twirhaw haist der feler
Fäler verfüret von unden nach wunsch er rüret / Glosa
Merck mit dem feler werden alle vechter die da gern versetzen geplendt und verfürt und gern geschlagen Den treib also So dw steest in der twir So thue als ob dw im aus der twir oder aus oberhewen schlagen wölst zw seiner lincken seitten zw dem kopf und im haw so verwende oder vertzuck den haw und schlag yn mit der twir zw der underen plössen under seinen swert hinein zw dem haubt seiner rechten seitten oder wo dir die werden mag und haist unden gerürt so es under dem swert geschicht und nit von der under plös under der gürtl So ist er nach wunsch gerürt und geschlagen krieg
- Ain ander stuck der twir verkerer
Verkerer zwinget durchlauffer auch mit ringet / Den elenbogen / gewiss nym spring im in die wage / Glosa
Das ist so dw mit dem feler wie oben gelert ist gehawen hast so schlag widerherumb ym zw der lincken seitten mit der twir fellt er dann dir auf dein swert so heng resch und lauff im durch in dem hengen und nym ym die wag bey dem elenbogen und schreit in für mit deinem lincken fuess und stos yn darüber Auch magstu in dem durchlauffen ain ringen machen also Trit hinder yn mit deinem lincken fues und mit dem lincken arm var im vornen umb den hals und würff yn hindersich über den fues dw magst auch wol
