hinder seinem rucken umb sein hals und werffen Etlich sagen also so dw mit ainem angepunden hast So verkere dein swert also das dein dawme unden khumme das ist in die twir und stich in mit dem ort zw dem gesicht so zwingstu yn das er dir versetzen muβ und in der versatzung so lauff ym ein und stos ym den elenbogen oder ring wie oben etc Item wie dw durchlauffen sollt das findestu hernach in dem stuck das da spricht Durchlauff las hangenn
- Aber ain stuck
Fäler zwifach trifft man den alten schnidt mit machtkrafft
Nach maister hansen sag Das ist wie dw in mit dein ersten feler verfürt hast und yn geschlagen zw seiner rechten seitten etc wie oben So schlach resch noch ain mal herwiderumb im zw der anderen seiner rechten seitten das haist zwifach etc Dw magst halt dreistund also machen herwiderumb zw der plös kumbstu dann auf sein swert das er versetzt so krieg oder wind mit im etc
Will er dann auch schlagen so gang ym indes nach mit dem schnit oben das haist der zwifach feler darumb das man in ainem zwvechten zwaierlai verfurung darauβ treiben sol Die ersten treib also wann dw mit dem zufechten zw ym kumbst so schreit oder spring mit dem rechten fues So dir der linck fues vornen stet gegen ym und thue als dw in mit ainer twir zw seiner lincken seitten zw dem kopf schlagen wöllest und vertzuck den schlag und mit dem lincken fues hinfur auf sein rechte gesprungen und schlag ym zw seiner rechten seitten an den kopf ist schier wie in dem ersten stuck krieg
- Aber ain stuck
Zwifach es fürbas schreit yn linck und bis nit lass
Das ist oben am nechsten stuck wie maister Hans sagt ausglegt mit dem schnit Etlich aber sagen das sey wenn dw yn mit der ersten verfürung zw seiner rechten seitten zw dem kopf geschlagen hast So schlach pald widerumb im zw der rechten seitten ym zw dem kopf und var mit der kurtzen schneid aus gekreutzten armen über sein swert und spring ym linck das ist auf dein lincke seitten und schneid yn mit der langen
