Page:Cod.icon. 393 I 120v.jpg

Ictus supernus contra hostis caput unde captivandi brachii habitus formatur.

In hac pugna sinistrum pedem praeponas, acinacem dextra teneas brachio sursum extento in forma ictus superi ita ut acies longa praemittatur. Inde dextro pede ingressus contra adversarium, directe caput eius acie longa praemissa pulsato. Verum si is idem contra te usurparit, dextrum pedem praeponente, tum vel obviam ferias, vel mucronem in visum ipsius impellito ea ratione ut ictum hostilem acie brevi avertas. Sed ex eo ipso habitu curabis, ingressus ad hostem sinistro pede brachiumque tuum hostili brachio dextro interne superiniicias retro ipsius acinacem subiiciasque brachium, simulatque acinacem ipsius alae tuae sinistrae firmiter tenendo. Sin autem pari ratione te adprehenderit adversarius tum dextrum pedem interne ultra ipsius laevum colloces, nec non subito inversum brachium sinistrorsum collo eius circumiicias, inde correpto eius pectore superne ipsum per pedem in latus sinistrum tuum protrahas si rite confeceris, hostis concidet nec quicquam conari vel moliri poterit.