Page:Der Allten Fechter gründtliche Kunst (Christian Egenolff) 1531-1537.pdf/19

VII v Das ander Läger würdt genant Hanged ort, und ist zwifach Krump auff behend, Würff dein ort auff die hend, Krump wer wol setzt, Mit schriten vil haew letzt. Haw krump zur flechen, Wiltu die meyster schwechen. Wann es glitzt oben, So stand ab, das thu ich loben. Krump mit Kurtzhaw, Durchwechsel damit schaw. Krump wer dich irret, Der edel Krieg daruff verferet Das er fürwar, Nit weyß wo er ist one fahr. Hangend ort legert den rechten fuß vor, mitt der fleche under das angesicht tretten, kurtz und hoch versetzt, was streych vonn tach geschlagen würdt, kurtz ab lassen lauffen, und lang nachtretten mit dem streych. Bruch. Treib von der rechten handt, den rechten fuß vor, ligt er still im Hangenden ort, leg ihm die kurtze schneid an sein recht ohr, so darff er nit zucken, wo er aber zuckt, so entblößt er sich. Wider Bruch. Wann dir einer die kurtze schneid an den hals legt, verwende dein hend mit dem schwerdt, und sperr ihn von oben mit der langen schneid Und greiff mit deiner lincken hand an seinen knopff, wirff ihn auff die linck seiten über sein schwerdt. Eisern Pforten. Das Dritt Läger würt genant, die Eisern Pforten, oder die Zwir nach den Alten. Zwir benimpt Was von Tach her kümpt. Zwir mit der sterck, Dein Arbeit damit merck. Zwir