Wiktenauer logo.png

Page:Der Altenn Fechter anfengliche kunst (Christian Egenolff) 1531-1537.pdf/11

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

Hör was ich rathe,
 Reiß ab, haw mit drate,
Setz an vier enden,
 Bleib daruff ler wiltu enden.

Hangend Ort.

Das ander Läger würdt genant Hangend ort, und ist zwifach

Krump auff behend,
 Würff dein ort auff die hend,
Krump wer wol setzt,
 Mit schriten vil häw letzt.
Haw krump zur flechen,
 Wiltu die meyster schwechen.
Wann es glitzt oben,
 So stand ab, das thu ich loben.
Krump mit Kurtzhaw,
 Durchwechsel damit schaw.
Krump wer dich irret,
 Der edel Krieg daruff verferet
Das er fürwar,
 Nit weyßt wo er ist one fahr.

Hangend ort legert den rechten fuß vor, mit der fleche under das angesicht tretten, kurtz und hoch versetzt, was streych vonn tach geschlagen würdt, kurtz ab lassen lauffen, und lang nachtretten mit dem streych.

Bruch.

Treib von der rechten handt, den rechten fuß vor, ligt er still im Hangenden ort, leg ihm die kurtze schneid an sein recht ohr, so darff er nit zucken, wo er aber zuckt, so entblößet er sich.

Wider Bruch.

Wann dir einer die kurtze schneid an den halß legt, verwende dein hend mit dem schwerd, und sperr ihn von oben mit der langen schneid, Und greiff mit deiner lincken hand an seinen knopff, wirff ihn auff die linck seiten über sein schwerdt.

Eisern Pforten.

Das Dritt Läger würt genant, die Eisern Pforten, oder die Zwir, nach den Alten.

Zwir benimpt
 Was von Tach her kümpt.