Triangel.
Leger dich mit geschrenckten henden vorm gesicht / Schlegt er dir Püffel auß dem Hohen ort / so verwend dein hend von unden auff / und tritt in falsch tritt / und Versetz dich kurtz / das er Abrüst auff deiner fleche / Darnach schlahe mit dem tritt und langen schneiden nach.
¶ Bruch.
Wann du dich verhawen hast auff ihn / so fare mitt deinem knopf übersich so bistu auch versetzt / Laß ihn auch abrauschen / und arbeit mit ihm nach vortheil.
Von Absetzen.
Lere Absetzen /
haew / Stich künstlich letzen.
Wer auff dich sticht /
Sein ort brich.
Von baiden seitten /
Triff allmal / wiltu streitten.
Durchlauffen.
Durchlauffen laß hangen /
Mit dem knopff greiff / wiltu Rangen.
Wer gegen dir sterckt /
Durchlauffen damit merck.
¶ Regel.
Merck / Wann du einem zustichst / das du triffst mit dem ort / so wind alwege dein schwerdt mitt dem knopff under die rechte achseln.
Vom Schilhaw.
Schiler bricht /
Was Püffel schlegt oder sticht /
Wer Wechsel trauwet /
Schiler ihn darauß beraubet /
