mit gantzem leib in des auff die lincke seittenn, so nimst ihm das messer.
Ein werffen.
Ruck mit deiner lincken sein rechte handt an dein lincke seit, laß dein messer fallen, In des greiff mit deiner rechten handt in sein recht kniebug, wirff ihn also für dich.
Ein Anlauffen.
Durchlauff, Entrüst,
Den elnbogen, reib handt zur brüst,
Recht wiltu umbspringen
Uffrecht arm bricht geringe.
Mit dem Entrüst haw das der daum unden steh am messer, uff der fleche, haw ihm zur rechten seiten zum kopff, mit der kurtzen schneid, truck vast an ihn mit dem ghültz, das die hend an einander ruͤren, In des laß dein messer fallen, ergreiff das gelenck seiner hand, darinn er das messer hat, reib die umb, und nims gewicht mitt dem elnpogen, spring in die wage, wirff ihn über dein linck beyn oder hufft.
Bruch.
Nimpt er das gewicht,
Widerumb mach das zunicht,
In der arbeyt mit schnelligkeyt,
Sein kunst würt nidergeleyt
Fürkomen was er gegen dir fürnimpt, und uͤb es an ihm.
Hat er dein rechte handt also gefasset, weil er dirs gewicht nemen will beim elnpogen, so far gschwind nider mit dem elpogen starck an deinn leib, schnell ihn mitt deim messer uff seinn kopff.
Der verporgen Griff.
Einn beschliessen, halten und nͤten still zustehn oder lauffen.
Lern arm verschiessen,
Ja künstlich den beschliessen,
Damit du ihn magst fuͤren,
Noͤten zulauffen, oder nit zu ruͤren.
